جب گھر سے جنازہ اٹھے: میت کی تدفین کے بعد کے احکام (قسط: 2)

جب گھر سے جنازہ اٹھے: میت کی تدفین کے بعد کے احکام(قسط:2)

ورثاء کے فرائض — قرآن و سنت اور سیرت نبوی ﷺ کی روشنی میں

ترکہ: جہاں ورثاء کی اصل آزمائش شروع ہوتی ہے

جنازہ اٹھ گیا، قبر پر مٹی ڈال دی گئی، تعزیت کرنے والے لوٹ گئے۔ اب وہ مرحلہ آتا ہے جہاں اکثر خاندان امتحان میں ناکام ہو جاتے ہیں: مرحوم کا چھوڑا ہوا مال۔ قرآن کریم نے اس کی ترتیب خود متعین کر دی ہے۔ میراث کے حصے بیان کرنے کے بعد بار بار فرمایا: ﴿مِن بَعْدِ وَصِيَّةٍ يُوصِي بِهَا أَوْ دَيْنٍ﴾ "(یہ حصے) اس وصیت کے بعد ہیں جو وہ کر جائے، یا قرض کے بعد" (النساء: 11)۔

آیت میں وصیت کا ذکر قرض سے پہلے ہے، مگر عملاً قرض مقدم ہے، اور اس پر امت کا اجماع ہے (تفسیر ابن کثیر، النساء: 11)۔ مفسرین نے وصیت کو لفظاً پہلے لانے کی حکمت یہ بیان کی ہے کہ ورثاء اسے نظر انداز نہ کر دیں، کیونکہ قرض کا مطالبہ کرنے والا تو خود موجود ہوتا ہے، جبکہ وصیت کا کوئی مطالبہ کرنے والا نہیں ہوتا۔ یوں ترکے میں شرعی ترتیب چار مرحلوں کی ہے: پہلے تجہیز و تکفین کے ضروری اخراجات اعتدال کے ساتھ، پھر قرض کی ادائیگی، پھر ایک تہائی تک وصیت کا نفاذ، اور آخر میں باقی مال کی وارثوں میں تقسیم۔

قرض: میت کی جان اس میں اٹکی ہے

قرض کو ہم ایک دنیاوی معاملہ سمجھتے ہیں، مگر رسول اللہ ﷺ نے اسے آخرت کا مسئلہ بنا کر پیش کیا: «نَفْسُ الْمُؤْمِنِ مُعَلَّقَةٌ بِدَيْنِهِ حَتَّى يُقْضَى عَنْهُ» "مومن کی جان اس کے قرض کی وجہ سے لٹکی رہتی ہے یہاں تک کہ وہ ادا کر دیا جائے" (جامع ترمذی: 1078، سنن ابن ماجہ: 2413، صحیح)۔ اس سے بھی سخت بات یہ فرمائی: «يُغْفَرُ لِلشَّهِيدِ كُلُّ ذَنْبٍ إِلَّا الدَّيْنَ» "شہید کا ہر گناہ معاف کر دیا جاتا ہے سوائے قرض کے" (صحیح مسلم: 1886)۔ جب اللہ کی راہ میں جان دینے والے کا یہ حال ہے تو عام آدمی کا کیا ہوگا؟

اس معاملے کی سنگینی کا اندازہ ایک واقعے سے کیجیے۔ سیدنا سلمہ بن اکوعؓ بیان کرتے ہیں کہ رسول اللہ ﷺ کے پاس ایک جنازہ لایا گیا۔ آپ ﷺ نے پوچھا: کیا اس پر کوئی قرض ہے؟ بتایا گیا: تین دینار۔ آپ ﷺ نے فرمایا: «صَلُّوا عَلَى صَاحِبِكُمْ» "اپنے ساتھی کا جنازہ تم پڑھ لو"۔ سیدنا ابو قتادہؓ نے عرض کیا: اللہ کے رسول! آپ اس کا جنازہ پڑھائیں، اس کا قرض میرے ذمہ ہے۔ تب آپ ﷺ نے جنازہ پڑھایا (صحیح بخاری: 2289)۔ سیدنا جابرؓ کی روایت میں ہے کہ اگلے دن آپ ﷺ نے ابو قتادہؓ سے پوچھا کہ دینار ادا ہوئے یا نہیں؟ جب انہوں نے بتایا کہ ادا کر دیے، تو آپ ﷺ نے فرمایا: «الْآنَ بَرَدَتْ عَلَيْهِ جِلْدُهُ» "اب اس کی جلد ٹھنڈی ہوئی ہے" (مسند احمد: 14536، حسن)۔

رحمۃ للعالمین ﷺ نے قرض دار کا جنازہ پڑھانے میں توقف فرمایا تاکہ امت کو اس کی سنگینی کا احساس ہو۔ ورثاء کی پہلی فکر یہی ہونی چاہیے کہ مرحوم کی جلد ٹھنڈی ہو جائے۔ اس کے لیے مرحوم کی ڈائری، موبائل اور بینک اسٹیٹمنٹ دیکھی جائے، اور جنازے کے موقع پر یا مسجد میں اعلان کر دیا جائے کہ جس کا مرحوم پر کوئی حق ہو وہ رابطہ کرے۔ بیوی کا حق مہر اگر ادا نہیں ہوا تھا تو وہ بھی قرض ہے اور تقسیم سے پہلے ادا ہوگا۔

قرض صرف بندوں کا نہیں ہوتا، اللہ کا بھی ہوتا ہے: فرض زکوٰۃ جو ادا نہ ہوئی، فرض حج جو رہ گیا، نذر یا کفارہ۔ ایک شخص نے رسول اللہ ﷺ سے پوچھا کہ میری ماں فوت ہو گئی ہیں اور ان کے ذمے ایک مہینے کے روزے تھے، کیا میں ان کی طرف سے ادا کروں؟ آپ ﷺ نے فرمایا کہ اگر ان پر کسی کا قرض ہوتا تو کیا تم ادا نہ کرتے؟ پھر فرمایا: «فَدَيْنُ اللَّهِ أَحَقُّ أَنْ يُقْضَى» "تو اللہ کا قرض ادا کیے جانے کا زیادہ حقدار ہے" (صحیح بخاری: 1953، صحیح مسلم: 1148)۔

باپ کے قرض کو اپنا قرض سمجھنے کی سب سے روشن مثال سیدنا جابر بن عبداللہؓ ہیں۔ ان کے والد سیدنا عبداللہ بن عمرو بن حرامؓ غزوۂ احد میں شہید ہوئے اور بہت سا قرض چھوڑ گئے۔ جابرؓ کے پاس صرف کھجوروں کا ایک باغ تھا جس کی پیداوار قرض کے لیے ناکافی تھی، اور قرض خواہ سختی پر اتر آئے تھے۔ رسول اللہ ﷺ خود باغ میں تشریف لائے، کھجوروں کے ڈھیروں کے گرد چکر لگایا اور برکت کی دعا فرمائی۔ پھر جابرؓ نے ناپ ناپ کر سب قرض خواہوں کو ادا کیا، یہاں تک کہ سارا قرض اتر گیا اور کھجوریں پھر بھی بچ گئیں (صحیح بخاری: 2781)۔ یہی جابرؓ تھے جنہوں نے اپنی نو یتیم بہنوں کی دیکھ بھال کی خاطر کسی کنواری لڑکی کے بجائے ایک تجربہ کار بیوہ سے نکاح کیا تاکہ وہ بہنوں کو سنبھال سکے، اور رسول اللہ ﷺ نے ان کے اس فیصلے کو سراہا (صحیح بخاری: 4052، صحیح مسلم: 715)۔ نیک بیٹا باپ کے قرض کو اپنا قرض سمجھتا ہے، اور بہنوں کو بوجھ نہیں، امانت سمجھتا ہے۔

وصیت: ایک تہائی کی حد

قرض کے بعد مرحوم کی جائز وصیت پوری کی جائے، اور اس میں تبدیلی بہت بڑا گناہ ہے: ﴿فَمَن بَدَّلَهُ بَعْدَمَا سَمِعَهُ فَإِنَّمَا إِثْمُهُ عَلَى الَّذِينَ يُبَدِّلُونَهُ ۚ إِنَّ اللَّهَ سَمِيعٌ عَلِيمٌ﴾ "پھر جس نے اسے سننے کے بعد بدل دیا تو اس کا گناہ انہی پر ہے جو اسے بدلتے ہیں، بے شک اللہ سب کچھ سننے والا، جاننے والا ہے" (البقرۃ: 181)۔

مگر وصیت کی بھی ایک حد ہے۔ حجۃ الوداع کے موقع پر سیدنا سعد بن ابی وقاصؓ سخت بیمار ہوئے۔ ان کی صرف ایک بیٹی تھی، اور انہوں نے رسول اللہ ﷺ سے سارا مال، پھر آدھا مال صدقہ کرنے کی اجازت چاہی۔ آپ ﷺ نے منع فرمایا، پھر فرمایا:

یعنی وصیت زیادہ سے زیادہ ایک تہائی مال میں ہو سکتی ہے؛ اس سے زائد حصہ ورثاء کی رضامندی پر موقوف ہوگا۔ دوسری حد یہ ہے کہ وارث کے حق میں وصیت نہیں ہو سکتی، کیونکہ اس کا حصہ اللہ نے خود مقرر کر دیا ہے: «إِنَّ اللَّهَ قَدْ أَعْطَى كُلَّ ذِي حَقٍّ حَقَّهُ، فَلَا وَصِيَّةَ لِوَارِثٍ» "اللہ نے ہر حقدار کو اس کا حق دے دیا ہے، لہٰذا وارث کے لیے کوئی وصیت نہیں" (سنن ابی داؤد: 2870، جامع ترمذی: 2120، صحیح)۔ ہاں، اگر باقی بالغ ورثاء خوشی سے مان لیں تو گنجائش ہے۔ اور اگر وصیت ہی ناجائز ہو، مثلاً بیٹی کو محروم کرنے کی، قبر پختہ بنانے کی یا چالیسواں کرنے کی، تو اسے پورا نہیں کیا جائے گا، کیونکہ خالق کی نافرمانی میں مخلوق کی اطاعت نہیں۔

وراثت: اللہ کا مقرر کردہ حصہ

وراثت کی تقسیم کو قرآن نے کسی کی صوابدید پر نہیں چھوڑا۔ سورۃ النساء کی ابتدا ہی میں فرمایا:

اس آیت کا ہر ٹکڑا ایک دلیل ہے۔ "وَلِلنِّسَاءِ نَصِيبٌ" عورتوں کے حصے کا صریح اعلان ہے۔ "مِمَّا قَلَّ مِنْهُ أَوْ كَثُرَ" بتاتا ہے کہ مال تھوڑا ہو یا زیادہ، زمین ہو یا دکان، گاڑی ہو یا زیور، ہر چیز تقسیم ہوگی۔ اور "نَصِيبًا مَّفْرُوضًا" کہہ کر بات ختم کر دی کہ یہ حصہ مقرر شدہ ہے۔ "فرض" کا لغوی معنی ہے کسی چیز میں نشان لگا کر اس کی حد مقرر کر دینا (مفردات القرآن للراغب، مادہ: فرض)۔ اسی لیے علمِ میراث کو "عِلمُ الفرائض" کہا جاتا ہے، کیونکہ اس کے حصے اللہ نے خود متعین کر دیے ہیں۔ رسول اللہ ﷺ نے تقسیم کا اصول یوں بیان فرمایا: «أَلْحِقُوا الْفَرَائِضَ بِأَهْلِهَا، فَمَا بَقِيَ فَهُوَ لِأَوْلَى رَجُلٍ ذَكَرٍ» "مقررہ حصے ان کے حقداروں کو دو، اور جو بچ جائے وہ قریب ترین مرد رشتہ دار کا ہے" (صحیح بخاری: 6732، صحیح مسلم: 1615)۔

میراث کی آیات کے فوراً بعد اللہ تعالیٰ نے ایک وعدہ اور ایک وعید سنائی:

گویا وراثت میں ہیرا پھیری کوئی چھوٹی بات نہیں، حدود اللہ سے تجاوز ہے۔

آیتِ میراث کیسے اتری؟

اس آیت کا پس منظر ہمارے معاشرے کا آئینہ ہے۔ سیدنا سعد بن ربیعؓ غزوۂ احد میں شہید ہوئے۔ ان کی بیوہ اپنی دو بیٹیوں کو لے کر رسول اللہ ﷺ کی خدمت میں حاضر ہوئیں اور عرض کیا: اللہ کے رسول! یہ سعد کی بیٹیاں ہیں، ان کے والد آپ کے ساتھ احد میں شہید ہو گئے، اور ان کے چچا نے سارا مال لے لیا ہے، ان کے لیے کچھ نہیں چھوڑا، اور مال کے بغیر ان کا نکاح بھی نہیں ہو سکے گا۔ آپ ﷺ نے فرمایا: اللہ اس بارے میں فیصلہ فرمائے گا۔ پھر میراث کی آیت نازل ہوئی، اور آپ ﷺ نے چچا کو بلا کر حکم دیا: «أَعْطِ ابْنَتَيْ سَعْدٍ الثُّلُثَيْنِ، وَأَعْطِ أُمَّهُمَا الثُّمُنَ، وَمَا بَقِيَ فَهُوَ لَكَ» "سعد کی دونوں بیٹیوں کو دو تہائی دو، ان کی ماں کو آٹھواں حصہ دو، اور جو بچے وہ تمہارا ہے" (سنن ابی داؤد: 2891، جامع ترمذی: 2092، حسن)۔

جاہلیت میں بیٹیوں کو وراثت سے محروم رکھنا رواج تھا۔ اسلام نے آسمان سے آیت اتار کر یہ رواج توڑا۔ آج اگر ہم بیٹیوں اور بہنوں کو محروم کرتے ہیں تو درحقیقت اسی جاہلیت کی طرف لوٹ رہے ہیں جسے قرآن نے ختم کیا تھا۔

بہنوں کا حق اور ہمارے عذر

ہمارے معاشرے میں بہنوں کو حصہ نہ دینے کے لیے کچھ عذر بہت عام ہیں۔ کہا جاتا ہے کہ بہن کو جہیز دے دیا تھا۔ حالانکہ جہیز ایک تحفہ تھا اور وراثت اللہ کا فریضہ ہے؛ ایک دوسرے کا بدل نہیں ہو سکتا۔ کہا جاتا ہے کہ بہن نے خود معاف کر دیا۔ مگر اکثر یہ معافی شرم، دباؤ یا میکے سے رشتہ ٹوٹ جانے کے خوف میں دی جاتی ہے، اور ایسی معافی کا شرعاً کوئی اعتبار نہیں۔ صحیح طریقہ یہ ہے کہ پہلے حصہ بہن کے ہاتھ میں دیا جائے، پھر وہ اپنی خوشی سے جو چاہے کرے۔ بعض علاقوں میں "چادر" یا "پرچی" کی رسم ہے جس میں ایک رسمی چادر کے بدلے بہن سے حصہ چھڑوا لیا جاتا ہے؛ وفاقی شرعی عدالت اس رسم کو غیر اسلامی اور غیر قانونی قرار دے چکی ہے۔

جو بھائی بہن کی زمین دبا کر بیٹھا ہے، وہ یہ حدیث سن لے: «مَنْ ظَلَمَ قِيدَ شِبْرٍ مِنَ الْأَرْضِ طُوِّقَهُ مِنْ سَبْعِ أَرَضِينَ» "جس نے بالشت بھر زمین بھی ظلم سے لی، قیامت کے دن سات زمینوں کا طوق اس کے گلے میں ڈالا جائے گا" (صحیح بخاری: 2452، صحیح مسلم: 1610)۔ ملکی قانون بھی اس معاملے میں شریعت کے ساتھ کھڑا ہے: تعزیراتِ پاکستان کی دفعہ 498-A کے تحت کسی عورت کو دھوکے یا غیر قانونی طریقے سے وراثت سے محروم کرنا قابلِ سزا جرم ہے۔

اسی طرح اگر ورثاء میں نابالغ یتیم بچے ہوں تو ان کا حصہ الگ اور محفوظ رکھا جائے۔ قرآن کی وعید بہت سخت ہے: ﴿إِنَّ الَّذِينَ يَأْكُلُونَ أَمْوَالَ الْيَتَامَىٰ ظُلْمًا إِنَّمَا يَأْكُلُونَ فِي بُطُونِهِمْ نَارًا ۖ وَسَيَصْلَوْنَ سَعِيرًا﴾ "جو لوگ یتیموں کا مال ظلم سے کھاتے ہیں وہ درحقیقت اپنے پیٹوں میں آگ بھرتے ہیں، اور وہ عنقریب بھڑکتی آگ میں داخل ہوں گے" (النساء: 10)۔

تقسیم میں تاخیر بھی ایک ظلم ہے۔ برسوں ترکہ تقسیم نہ کرنا جھگڑوں، ناجائز قبضوں اور حق تلفی کا دروازہ کھولتا ہے۔ بہتر یہ ہے کہ تمام اثاثوں کی فہرست بنا کر کسی مستند عالم سے حصوں کا حساب کروا لیا جائے، اور نادرا سے وراثتی سرٹیفکیٹ (Succession Certificate) بنوا کر بینک، جائیداد اور گاڑی کی منتقلی جلد مکمل کی جائے۔

سوگ اور بیوہ کی عدت

اسلام نے غم کو بھی ایک حد دی ہے، تاکہ زندگی رک نہ جائے۔ قرآن کریم نے بیوہ کی عدت مقرر کی: ﴿وَالَّذِينَ يُتَوَفَّوْنَ مِنكُمْ وَيَذَرُونَ أَزْوَاجًا يَتَرَبَّصْنَ بِأَنفُسِهِنَّ أَرْبَعَةَ أَشْهُرٍ وَعَشْرًا﴾ "اور تم میں سے جو لوگ فوت ہو جائیں اور بیویاں چھوڑ جائیں، وہ بیویاں چار مہینے دس دن اپنے آپ کو روکے رکھیں" (البقرۃ: 234)۔ اور رسول اللہ ﷺ نے عام رشتہ داروں کے سوگ کی حد بیان فرمائی: «لَا يَحِلُّ لِامْرَأَةٍ تُؤْمِنُ بِاللَّهِ وَالْيَوْمِ الْآخِرِ أَنْ تُحِدَّ عَلَى مَيِّتٍ فَوْقَ ثَلَاثٍ، إِلَّا عَلَى زَوْجٍ أَرْبَعَةَ أَشْهُرٍ وَعَشْرًا» "اللہ اور آخرت کے دن پر ایمان رکھنے والی عورت کے لیے جائز نہیں کہ کسی میت پر تین دن سے زیادہ سوگ کرے، سوائے شوہر کے کہ اس پر چار ماہ دس دن" (صحیح بخاری: 1280، صحیح مسلم: 1486)۔

صحابیات اس حد کا کتنا لحاظ رکھتی تھیں، اس کا اندازہ ام المؤمنین سیدہ ام حبیبہؓ کے عمل سے ہوتا ہے۔ ان کے والد سیدنا ابو سفیانؓ کا انتقال ہوا تو تیسرے دن انہوں نے خوشبو منگوائی، اسے اپنے رخساروں پر ملا اور فرمایا: مجھے خوشبو کی کوئی ضرورت نہیں، مگر میں نے رسول اللہ ﷺ کو یہ فرماتے سنا ہے کہ شوہر کے سوا کسی پر تین دن سے زیادہ سوگ جائز نہیں (صحیح بخاری: 1280)۔ اسی روشنی میں سوگ کو سال بھر کھینچنا، برسیاں منانا اور گھر میں خوشی کے مواقع روک دینا سنت کے خلاف ہے۔

حاملہ بیوہ کی عدت بچے کی پیدائش پر ختم ہو جاتی ہے: ﴿وَأُولَاتُ الْأَحْمَالِ أَجَلُهُنَّ أَن يَضَعْنَ حَمْلَهُنَّ﴾ (الطلاق: 4)۔ سیدہ سبیعہ اسلمیہؓ کے شوہر حجۃ الوداع میں فوت ہوئے اور چند دن بعد ان کے ہاں ولادت ہو گئی؛ رسول اللہ ﷺ نے فتویٰ دیا کہ ان کی عدت پوری ہو گئی اور وہ چاہیں تو نکاح کر سکتی ہیں (صحیح بخاری: 3991، صحیح مسلم: 1484)۔

بیوہ اپنی عدت شوہر کے گھر میں گزارے۔ سیدہ فریعہ بنت مالکؓ کے شوہر قتل ہو گئے تو انہوں نے اپنے میکے منتقل ہونے کی اجازت چاہی، کیونکہ شوہر نے اپنی ملکیت کا کوئی گھر نہیں چھوڑا تھا۔ رسول اللہ ﷺ نے پہلے اجازت دی، پھر بلا کر فرمایا: «امْكُثِي فِي بَيْتِكِ حَتَّى يَبْلُغَ الْكِتَابُ أَجَلَهُ» "اپنے (اسی) گھر میں رہو یہاں تک کہ عدت کی مدت پوری ہو جائے" (سنن ابی داؤد: 2300، جامع ترمذی: 1204، صحیح)۔ عدت کے دوران بیوہ زیب و زینت، خوشبو، سرمہ، زیور اور بھڑکیلے رنگین کپڑوں سے پرہیز کرے (صحیح بخاری: 5342، صحیح مسلم: 938)۔

مگر یہیں ہم نے شریعت کی آسانی کو رسموں کی سختی سے بدل دیا ہے۔ بیوہ نہا سکتی ہے، صاف ستھرے سادہ کپڑے بدل سکتی ہے، گھر کے صحن میں آ سکتی ہے، چاند دیکھ سکتی ہے، محرم اور ضرورت کے وقت غیر محرم سے پردے کے ساتھ بات کر سکتی ہے، اور علاج، ملازمت یا عدالت جیسی ضرورت کے لیے دن میں گھر سے نکل سکتی ہے۔ اسے ایک کمرے میں بند کر دینا، کسی سے بات نہ کرنے دینا یا سفید لباس کو لازم سمجھنا شرعی پابندیاں نہیں، محض رسمیں ہیں جو ایک غمزدہ عورت کے دکھ کو اور بڑھا دیتی ہیں۔

مرحوم کے لیے جاری رہنے والی نیکیاں

موت کے ساتھ انسان کے عمل کا دفتر بند ہو جاتا ہے، مگر رسول اللہ ﷺ نے تین کھڑکیاں کھلی رہنے کی خبر دی:

یہی وہ دروازے ہیں جو قرآن و سنت نے کھولے ہیں، اور ان میں سے کوئی بھی کسی خاص دن، تاریخ یا اجتماع کا پابند نہیں۔

سب سے پہلا اور سب سے آسان دروازہ دعا ہے۔ قرآن نے اہلِ ایمان کی یہ صفت بیان کی کہ وہ پہلے گزر جانے والوں کے لیے دعا کرتے ہیں: ﴿رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلًّا لِّلَّذِينَ آمَنُوا﴾ "اے ہمارے رب! ہمیں اور ہمارے ان بھائیوں کو بخش دے جو ہم سے پہلے ایمان لائے، اور ہمارے دلوں میں اہلِ ایمان کے لیے کوئی کینہ نہ رکھ" (الحشر: 10)۔ ہر نماز کے بعد، تہجد میں اور قبر کی زیارت کے وقت مرحوم کے لیے دعا کی جائے۔ قبرستان جائیں تو وہ دعا پڑھیں جو رسول اللہ ﷺ نے سکھائی: «السَّلَامُ عَلَيْكُمْ أَهْلَ الدِّيَارِ مِنَ الْمُؤْمِنِينَ وَالْمُسْلِمِينَ، وَإِنَّا إِنْ شَاءَ اللَّهُ لَلَاحِقُونَ، أَسْأَلُ اللَّهَ لَنَا وَلَكُمُ الْعَافِيَةَ» "اے اس بستی کے مومنو اور مسلمانو! تم پر سلامتی ہو، ہم بھی ان شاء اللہ تم سے ملنے والے ہیں، میں اللہ سے اپنے اور تمہارے لیے عافیت مانگتا ہوں" (صحیح مسلم: 975)۔

دوسرا دروازہ صدقہ ہے۔ ایک صحابی نے عرض کیا: اللہ کے رسول! میری ماں اچانک فوت ہو گئیں، میرا خیال ہے اگر وہ بات کر پاتیں تو صدقہ کرتیں، کیا اب میں ان کی طرف سے صدقہ کروں تو انہیں اجر ملے گا؟ آپ ﷺ نے فرمایا: ہاں (صحیح بخاری: 1388، صحیح مسلم: 1004)۔ اور اگر صدقہ جاریہ ہو تو اس کا اجر مسلسل پہنچتا رہتا ہے۔ سیدنا سعد بن عبادہؓ کی والدہ کا انتقال ہوا تو انہوں نے پوچھا کہ کون سا صدقہ افضل ہے؟ آپ ﷺ نے فرمایا: پانی۔ چنانچہ انہوں نے کنواں کھدوا کر وقف کر دیا اور کہا: یہ ام سعد کے لیے ہے (سنن ابی داؤد: 1681، حسن)۔ آج اس کی صورتیں بے شمار ہیں: ہینڈ پمپ، واٹر کولر، مسجد یا مدرسے کی تعمیر میں حصہ، قرآن کے نسخے اور دینی کتب، کسی طالبِ علم کی کفالت، یا ہسپتال میں کوئی مستقل سہولت۔

تیسرا دروازہ ان عبادات کی قضا ہے جو مرحوم کے ذمے رہ گئیں۔ رسول اللہ ﷺ نے فرمایا: «مَنْ مَاتَ وَعَلَيْهِ صِيَامٌ صَامَ عَنْهُ وَلِيُّهُ» "جو فوت ہو جائے اور اس کے ذمے روزے ہوں تو اس کا ولی اس کی طرف سے روزے رکھے" (صحیح بخاری: 1952، صحیح مسلم: 1147)۔ اسی طرح قبیلہ جہینہ کی ایک خاتون نے عرض کیا کہ میری ماں نے حج کی نذر مانی تھی اور حج سے پہلے فوت ہو گئیں، کیا میں ان کی طرف سے حج کروں؟ آپ ﷺ نے فرمایا: ہاں، ان کی طرف سے حج کرو؛ اللہ کا حق ادا کرو کیونکہ اللہ اس کا زیادہ حقدار ہے کہ اس سے کیا ہوا عہد پورا کیا جائے (صحیح بخاری: 1852)۔

چوتھا دروازہ مرحوم کے تعلقات کو زندہ رکھنا ہے۔ رسول اللہ ﷺ نے فرمایا: «إِنَّ أَبَرَّ الْبِرِّ صِلَةُ الْوَلَدِ أَهْلَ وُدِّ أَبِيهِ» "سب سے بڑی نیکی یہ ہے کہ بیٹا اپنے باپ کے دوستوں سے تعلق جوڑے رکھے" (صحیح مسلم: 2552)۔ خود آپ ﷺ سیدہ خدیجہؓ کی وفات کے برسوں بعد بھی جب کوئی بکری ذبح کرتے تو اس کا گوشت ان کی سہیلیوں کو بھجواتے تھے (صحیح بخاری: 3818)۔

اور سب سے بڑھ کر، اولاد کی اپنی نیک زندگی۔ حدیث میں "وَلَدٍ صَالِحٍ" کا ذکر بتاتا ہے کہ نیک اولاد خود والدین کا جاری رہنے والا عمل ہے۔

ذرا سوچیے! ہم مرحوم کے نام پر دیگیں پکواتے ہیں جنہیں اکثر کھاتے پیتے لوگ کھا کر چلے جاتے ہیں۔ اگر اسی رقم سے کسی غریب بستی میں پانی کا ایک نلکا لگ جائے تو قیامت تک ہر پیاسے کا ہر گھونٹ مرحوم کے نامۂ اعمال میں لکھا جاتا رہے گا۔

رسوم و رواج: محبت سے اصلاح

یہ بات شروع ہی میں واضح رہنی چاہیے کہ جو لوگ مرحومین کے لیے مختلف رسمیں ادا کرتے ہیں، ان کی نیت عموماً محبت اور خیر خواہی کی ہوتی ہے۔ ہم ان کی نیت پر سوال نہیں اٹھاتے۔ مگر عبادت میں صرف نیت کافی نہیں، طریقہ بھی وہی ہونا چاہیے جو رسول اللہ ﷺ نے سکھایا۔ آپ ﷺ کا فرمان ہے: «مَنْ أَحْدَثَ فِي أَمْرِنَا هَذَا مَا لَيْسَ مِنْهُ فَهُوَ رَدٌّ» "جس نے ہمارے اس دین میں کوئی ایسی نئی بات نکالی جو اس میں سے نہیں، وہ مردود ہے" (صحیح بخاری: 2697، صحیح مسلم: 1718)۔

اسے ایک روزمرہ مثال سے سمجھیے۔ ڈاکٹر نے دوا دن میں دو بار لکھی ہو اور کوئی محبت میں مریض کو پانچ بار کھلا دے تو یہ خدمت نہیں، نقصان ہے۔ میت کی خدمت بھی وہی ہے جو نسخۂ نبوی میں لکھی ہے، اس سے کم نہ زیادہ۔

قل، تیجا، جمعراتیں، چالیسواں اور برسی

ایک سادہ سوال پر غور کیجیے۔ رسول اللہ ﷺ کی زندگی میں آپ کی محبوب اہلیہ سیدہ خدیجہؓ فوت ہوئیں، آپ کے چچا سیدنا حمزہؓ شہید ہوئے، آپ کی تین بیٹیاں سیدہ زینبؓ، سیدہ رقیہؓ اور سیدہ ام کلثومؓ اور بیٹا ابراہیمؓ آپ کے سامنے دنیا سے رخصت ہوئے۔ کیا کسی کا تیجا ہوا؟ کسی کا چالیسواں منایا گیا؟ پھر خود رسول اللہ ﷺ کا وصال ہوا۔ صحابہ کرام سے بڑھ کر آپ سے محبت کرنے والا کون تھا؟ کیا انہوں نے آپ کا چالیسواں یا برسی منائی؟ اگر یہ نیکی ہوتی تو وہ ہم سے پہلے کرتے۔

مخصوص دن مقرر کر کے اجتماع کرنا اور کھانا کھلانا وہی چیز ہے جسے صحابہ کرام نوحے میں شمار کرتے تھے، جیسا کہ سیدنا جریرؓ کا قول گزر چکا (سنن ابن ماجہ: 1612)۔ اس کا بہتر متبادل یہ ہے کہ وہی رقم کسی دن کی پابندی کے بغیر، خاموشی سے کسی مستحق پر صدقہ کر دی جائے۔

اجرت پر قرآن خوانی

مرحوم کے نام پر کرائے کے قاری بلا کر قرآن خوانی کروانا اور بدلے میں پیسے یا کھانا دینا سلف صالحین سے ثابت نہیں۔ رسول اللہ ﷺ نے فرمایا: «اقْرَءُوا الْقُرْآنَ، وَلَا تَأْكُلُوا بِهِ، وَلَا تَسْتَكْثِرُوا بِهِ» "قرآن پڑھو، مگر اسے کھانے کمانے کا ذریعہ نہ بناؤ اور نہ اس کے ذریعے مال بڑھاؤ" (مسند احمد: 15529، صحیح)۔ قرآن زندوں کی ہدایت کے لیے اترا ہے: ﴿لِّيُنذِرَ مَن كَانَ حَيًّا﴾ "تاکہ وہ اسے خبردار کرے جو زندہ ہے" (یٰس: 70)۔ اولاد خود قرآن پڑھے، اس پر عمل کرے اور والدین کے لیے دعا کرے؛ یہی ثابت شدہ طریقہ ہے۔

یتیموں کے مال سے دیگیں

جب ترکہ ابھی تقسیم بھی نہیں ہوا، اور ورثاء میں نابالغ بچے موجود ہیں، تو پوری برادری کے کھانے اسی مشترکہ مال سے پکانا یتیموں کا مال کھانا ہے، جس کے بارے میں سورۃ النساء کی آیت 10 کی سخت وعید ہم پڑھ چکے۔ کھانا کھانے والے مہمانوں کو بھی سوچنا چاہیے کہ وہ کس کا لقمہ کھا رہے ہیں۔

قبروں پر بے جا اعمال

قبر کو پختہ کرنا، اس پر عمارت بنانا، چادریں چڑھانا اور چراغاں کرنا صحیح احادیث کی روشنی میں ممنوع ہے (صحیح مسلم: 969، 970)۔ اسی طرح دفن کے بعد قبر پر اذان دینا، یا قبر کے گرد قرآن کا نسخہ گھما کر "حیلۂ اسقاط" کرنا سنت سے ثابت نہیں۔ مرحوم کی چھوڑی ہوئی نمازیں ورثاء کے حیلوں سے معاف نہیں ہوتیں؛ ہاں، اس کے لیے سچے دل سے دعا اور استغفار کیا جائے۔

غلط عقائد

بعض لوگ سمجھتے ہیں کہ مرحومین کی روحیں جمعرات کو گھر آتی ہیں اور دیکھتی ہیں کہ ان کے لیے کیا پکایا گیا۔ قرآن کہتا ہے: ﴿وَمِن وَرَائِهِم بَرْزَخٌ إِلَىٰ يَوْمِ يُبْعَثُونَ﴾ "اور ان کے پیچھے ایک آڑ ہے اس دن تک جب وہ اٹھائے جائیں گے" (المؤمنون: 100)۔ بعض لوگ بیوہ کو منحوس سمجھتے ہیں، یا کہتے ہیں کہ جس گھر میں موت ہوئی وہاں سال بھر شادی نہیں ہو سکتی۔ یہ نحوست کا جاہلی تصور ہے جسے رسول اللہ ﷺ نے رد کر دیا: «لَا عَدْوَى وَلَا طِيَرَةَ» "نہ (بذاتِ خود) چھوت ہے، نہ بدشگونی" (صحیح بخاری: 5776، صحیح مسلم: 2224)۔

الٹی ترجیحات

مہنگے کفن، شامیانے، تعزیتی اشتہارات، گاڑیوں کے قافلے اور بڑی بڑی دعوتیں، جبکہ مرحوم کا قرض ادا نہیں ہوا اور بہنوں کا حصہ ابھی تک کاغذوں میں دبا ہوا ہے۔ یہ دراصل ترجیحات کا الٹ جانا ہے۔ جو کام فرض تھے وہ پیچھے رہ گئے، اور جو ثابت نہیں تھے وہ لازم بنا لیے گئے۔

چند ضروری فقہی مسائل

میت کے رہ جانے والے روزے: "صَامَ عَنْهُ وَلِيُّهُ" والی حدیث (صحیح بخاری: 1952، صحیح مسلم: 1147) کے الفاظ عام ہیں، اسی لیے محدثین کی ایک جماعت کے نزدیک ولی رمضان کے قضا روزے اور نذر کے روزے دونوں رکھ سکتا ہے۔ شرط یہ ہے کہ مرحوم کو صحت یاب ہونے کے بعد قضا کا موقع ملا ہو اور اس نے نہ رکھے ہوں؛ اگر بیماری موت تک جاری رہی تو اس کے ذمے کچھ نہیں۔ اس معاملے میں آسانی بھی رکھی گئی ہے: اگر ولی روزے نہ رکھ سکے تو ہر روزے کے بدلے ایک مسکین کو کھانا کھلا دے، جیسا کہ سیدنا ابن عباسؓ اور سیدنا ابن عمرؓ سے منقول ہے۔ کئی ورثاء مل کر بھی روزے پورے کر سکتے ہیں۔

جنازہ رہ جائے تو؟ جو شخص جنازے میں شریک نہ ہو سکا، وہ قبر پر جا کر نمازِ جنازہ پڑھ سکتا ہے، جیسا کہ رسول اللہ ﷺ نے مسجد میں جھاڑو دینے والی خاتون کی قبر پر نماز پڑھی (صحیح بخاری: 458، صحیح مسلم: 956)۔ غائبانہ نمازِ جنازہ نجاشیؓ کے واقعے سے ثابت ہے (صحیح بخاری: 1245)۔

خواتین اور زیارتِ قبور: نوحہ اور بے پردگی کے بغیر خواتین کبھی کبھار قبرستان جا سکتی ہیں۔ سیدہ عائشہؓ نے رسول اللہ ﷺ سے پوچھا کہ قبرستان جاؤں تو کیا کہوں؟ آپ ﷺ نے انہیں دعا سکھائی (صحیح مسلم: 974)۔ البتہ کثرت سے جانا اور وہاں بین کرنا منع ہے۔

پنشن، جی پی فنڈ، انشورنس اور نامزد شخص: جو رقم مرحوم کی زندگی ہی میں اس کی ملکیت بن چکی تھی، جیسے تنخواہ کے بقایا جات، جی پی فنڈ اور بینک بیلنس، وہ ترکہ ہے اور تمام ورثاء میں تقسیم ہوگی۔ جو رقم کوئی ادارہ وفات کے بعد کسی متعین فرد کو بطور عطیہ دیتا ہے، جیسے بیوہ کو ملنے والی فیملی پنشن، وہ جمہور معاصر علماء کے نزدیک اسی فرد کا حق ہے۔ بینک یا ادارے کے کاغذات میں درج "نامزد" (Nominee) شخص مالک نہیں، امین ہے؛ نام لکھا ہونے سے وہ پوری رقم کا مالک نہیں بن جاتا۔

باپ کے کاروبار میں کام کرنے والے بیٹے: اگر کسی بیٹے نے والد کے کاروبار میں برسوں کام کیا تو یہ اس کی خدمت اور نیکی ہے، ملکیت نہیں۔ کاروبار تمام ورثاء میں ان کے حصوں کے مطابق تقسیم ہوگا، الا یہ کہ والد نے زندگی میں اس کی تنخواہ یا شراکت طے کر دی ہو۔

تجہیز و تکفین کا خرچ: یہ ترکے میں سے ادا ہوگا۔ اگر کوئی رشتہ دار اپنی خوشی سے اپنی جیب سے ادا کر دے تو یہ اس کی طرف سے احسان ہے۔

حاصلِ کلام

اس ساری گفتگو کا نچوڑ یہ ہے کہ اسلام نے میت کے بعد ورثاء کو تین بنیادی ذمہ داریاں سونپی ہیں۔ پہلی ذمہ داری جسم کا حق ہے: سنت کے مطابق، سادگی اور جلدی کے ساتھ غسل، کفن، جنازہ اور تدفین۔ دوسری ذمہ داری ذمے کا حق ہے: قرض کی ادائیگی، جائز وصیت کا نفاذ اور وراثت کی منصفانہ اور بروقت تقسیم، جس میں بہنوں، بیٹیوں اور یتیموں کا حق پورا پورا ادا ہو۔ تیسری ذمہ داری روح کا حق ہے: دعا، استغفار، صدقہ جاریہ اور مرحوم کے تعلقات کی پاسداری، کسی دن یا تاریخ کی قید کے بغیر۔

جو چیزیں ہم نے بڑی محنت اور خرچ سے اپنا رکھی ہیں، یعنی تیجے، چالیسویں، برسیاں اور دیگیں، ان میں سے کوئی بھی نہ میت کا قرض اتارتی ہے، نہ اس کی قبر کشادہ کرتی ہے۔ مرحوم کو ہماری دیگوں کی نہیں، ہماری دعاؤں اور ہماری دیانت کی ضرورت ہے۔

ورثاء کے لیے مختصر یادداشت

وفات کے فوراً بعد: آنکھیں بند کرنا، نام لے کر دعا، جسم ڈھانپنا، "إنا لله" اور صبر، نوحے سے پرہیز، سادہ اطلاع۔

تدفین تک: جلدی، مسنون غسل، سادہ سفید کفن، جنازے سے پہلے قرض کا اعلان، نمازِ جنازہ، تدفین، قبر پر ثابت قدمی کی دعا۔

پہلے ہفتوں میں: قرضوں کی فہرست اور ادائیگی (مہر، زکوٰۃ، نذر اور کفارہ سمیت)، وصیت کا ایک تہائی تک نفاذ، بیوہ کی عدت بغیر بے جا پابندیوں کے۔

جتنی جلد ممکن ہو: اثاثوں کی فہرست، عالم سے حصوں کا حساب، وراثتی سرٹیفکیٹ، ہر وارث کو اس کا حصہ اس کے ہاتھ میں، یتیموں کا حصہ محفوظ۔

ہمیشہ: دعا، صدقہ جاریہ، رہ جانے والے روزے یا حج، والدین کے دوستوں سے صلہ رحمی۔

آخر میں ایک سوال ہر قاری اپنے آپ سے پوچھے: کیا میرے والدین، بہن بھائیوں یا کسی عزیز کا ترکہ ابھی تک تقسیم ہونا باقی ہے؟ کیا کسی بہن کا حق میرے پاس پڑا ہے؟ اگر ایسا ہے تو اسے اس دن سے پہلے ادا کر دیجیے جب کوئی اور ہمارا ترکہ تقسیم کر رہا ہوگا۔

اور اپنی وصیت بھی آج ہی لکھ لیجیے، کیونکہ رسول اللہ ﷺ نے فرمایا: «مَا حَقُّ امْرِئٍ مُسْلِمٍ لَهُ شَيْءٌ يُوصِي فِيهِ يَبِيتُ لَيْلَتَيْنِ إِلَّا وَوَصِيَّتُهُ مَكْتُوبَةٌ عِنْدَهُ» "کسی مسلمان کے لیے، جس کے پاس وصیت کے قابل کوئی چیز ہو، یہ مناسب نہیں کہ دو راتیں بھی اس حال میں گزارے کہ اس کی وصیت اس کے پاس لکھی ہوئی نہ ہو" (صحیح بخاری: 2738، صحیح مسلم: 1627)۔ اپنے قرض لکھ کر رکھیے، اور اپنی اولاد کو بتا دیجیے کہ آپ کے بعد انہیں سنت کے مطابق کیا کرنا ہے۔ قرآن کی یہ نصیحت ہم سب کے لیے ہے: ﴿يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ﴾ "اے ایمان والو! اللہ سے ڈرو، اور ہر شخص دیکھ لے کہ اس نے کل کے لیے کیا آگے بھیجا ہے" (الحشر: 18)۔

اللہ تعالیٰ ہمارے مرحومین کی مغفرت فرمائے، ہمیں ان کے حقوق دیانت سے ادا کرنے کی توفیق دے، اور ہمارا خاتمہ ایمان پر فرمائے: