ربیعہ احسن کی موت: گولی واپس نہیں آتی — میڈیا ٹرائل اور اسلحہ اٹھانے کے نبوی آداب

گولی واپس نہیں آتی

ربیعہ احسن کی موت، ہمارا میڈیا ٹرائل اور اسلحے کے نبوی آداب

اتوار کا دن تھا، 8 نومبر، اور سہ پہر کے تین بج رہے تھے۔ راولپنڈی کے اڈیالہ روڈ پر گلشن آباد سیکٹر ٹو کے ایک گھر کے لان میں دو عورتیں بیٹھی تھیں، ایک ماں اور ایک بیٹی۔ نومبر کی وہ دھوپ تھی جو پنڈی میں سردیوں کی پہلی دستک ہوتی ہے۔ اچانک اندر سے ایک آواز آئی۔ صرف ایک آواز۔ بہن بھاگ کر اندر گئی اور بیڈروم کے فرش پر اپنی بہن کو خون میں لت پت پایا۔ رپورٹس کے مطابق قریب شوہر کھڑا تھا اور اس کے ہاتھ میں تیس بور کا پستول تھا۔

فرش پر پڑی خاتون ربیعہ احسن تھیں۔ اکتالیس سال عمر، 92 نیوز کا جانا پہچانا چہرہ، پروگرام "مقابل" کی میزبان، دو بیٹیوں کی ماں ۔ ایک تیرہ برس کی، ایک گیارہ برس کی۔ وہ پچھلی رات سکرین پر تھیں، اور موت سے چند گھنٹے پہلے انہوں نے اپنے یوٹیوب چینل پر ایک وی لاگ اپ لوڈ کیا تھا۔ زندگی کتنی بے خبر ہوتی ہے؛ انسان آخری ویڈیو بنا رہا ہوتا ہے اور اسے معلوم نہیں ہوتا کہ یہ آخری ہے۔

سی پی او راولپنڈی حسن مشتاق سکھیرا نے میڈیا کو بتایا کہ لاش بیڈروم سے ملی اور گولی سامنے سے گردن کے نیچے لگی۔ پنجاب فرانزک کی ٹیم موقع پر پہنچی، پستول اور خول برآمد ہوا، اور شوہر احسن طاہر ۔۔ اوورسیز پاکستانیز فاؤنڈیشن کے گریڈ اٹھارہ کے ڈپٹی ڈائریکٹر ۔۔ گرفتار کر لیے گئے۔ ان کا ابتدائی بیان ایک جملے پر مشتمل تھا۔گولی حادثاتی طور پر چلی۔ بعد میں رپورٹ ہوا کہ انہیں علم ہی نہیں تھا کہ پستول لوڈ ہے۔

اب سوال یہ ہے: یہ حادثہ تھا یا قتل؟میں آپ سے صاف بات کرنا چاہتا ہوں۔ آج اس سوال کا حتمی جواب کسی کے پاس نہیں۔ نہ میرے پاس، نہ کسی اینکر کے پاس، نہ ٹوئٹر کے کسی ٹرینڈ کے پاس۔ لیکن حادثے کے امکان کو پہلے دن رد کر دینا بھی انصاف نہیں، اور اس کے حق میں کچھ قرائن ایسے ہیں جنہیں شور میں دبنا نہیں چاہیے۔

پہلا قرینہ یہ پسند کی شادی تھی۔ دوسرا ابتدائی رپورٹس کے مطابق گھر والوں نے پولیس کو دیے گئے پہلے بیانات میں کسی جھگڑے کا ذکر نہیں کیا۔ تیسرا شوہر بھاگا نہیں۔ وہ اسی کمرے میں ملا، اس نے گولی چلانے سے انکار نہیں کیا، صرف ارادے سے انکار کیا۔ عام طور پر قاتل کہانی گھڑتا ہے ۔ ڈاکو آ گئے، خودکشی کر لی، کسی نامعلوم نے فائر کیا۔ یہاں ایسا کچھ نہیں ہوا۔ چوتھا ایک موقع پر خاندان کے ایک فرد کے حوالے سے یہ خبر بھی آئی کہ ان کے خیال میں واقعہ حادثاتی ہو سکتا ہے۔ اور پانچواں، شاید سب سے تلخ ،خالی پستول اس ملک میں ہر سال نہ جانے کتنے گھر اجاڑتا ہے۔ صفائی کرتے ہوئے، دکھاتے ہوئے، مذاق میں تانتے ہوئے ۔ چیمبر میں پڑی ایک بھولی ہوئی گولی کسی کی نیت نہیں پوچھتی۔

پھر عامر متین سامنے آئے۔ وہ ربیعہ کے ساتھی میزبان تھے، برسوں ایک ہی سکرین شیئر کی۔ انہوں نے کہا یہ کہانی کا اختتام نہیں، آغاز ہے۔ ان کے مطابق ربیعہ گھریلو تشدد کا شکار تھیں، علیحدگی کا سوچ رہی تھیں اور تقریباً دو ماہ کے لیے گھر چھوڑ گئی تھیں۔میں عامر متین کے دکھ کو سمجھتا ہوں۔ جس کے ساتھ آپ نے برسوں کیمرے کے سامنے بیٹھ کر قوم سے مکالمہ کیا ہو، اس کی لاش کی خبر انسان کو اندر سے توڑ دیتی ہے۔ ان کی بات کو سازش کہنا زیادتی ہوگی، ایک سینئر صحافی اپنی ساتھی کے بارے میں جو جانتا ہے، وہ کہنے کا حق رکھتا ہے۔ لیکن یہاں ایک بنیادی اصول یاد رکھنا ہو گاکہ گواہی اور فیصلے میں فرق ہوتا ہے۔ عامر متین کی بات ایک گواہی ہے جسے تفتیش میں پرکھا جانا چاہیے، اور احسن طاہر کا بیان بھی ایک دعویٰ ہے جسے اسی ترازو میں تولا جانا چاہیے۔ دونوں میں سے کوئی بھی فیصلہ نہیں۔ اب تک نہ گھریلو تشدد کے الزامات آزادانہ طور پر ثابت ہوئے ہیں اور نہ حادثے کا دعویٰ۔اور ہمیں وہ سوال بھی سامنے رکھنے ہوں گے جو حادثے کے حق میں نہیں جاتے۔ گولی سامنے سے لگی۔ رپورٹس کے مطابق پستول کا درست لائسنس پیش نہیں کیا جا سکا۔ مقتولہ کے بھائی خرم احمد دفعہ 302 کے مدعی ہیں اور مقدمہ واپس لینے کی خبروں کی تردید کر چکے ہیں۔ ان سوالوں کا جواب جذبات نہیں، سائنس دے گی۔ہم ایک عجیب قوم ہیں۔ ہم فرانزک رپورٹ سے پہلے ٹرینڈ بنا لیتے ہیں اور پوسٹ مارٹم سے پہلے فیصلہ سنا دیتے ہیں۔ کچھ لوگوں نے شوہر کو پہلے ہی دن پھانسی دے دی، کچھ نے پہلے ہی دن بری کر دیا۔ دونوں غلط ہیں۔ سائنس کام کر رہی ہے۔ پولیس نے ملزم کا پولی گراف ٹیسٹ پنجاب فرانزک سائنس ایجنسی لاہور سے کرانے کا فیصلہ کیا ہے، موبائل فونز کا فرانزک ہوگا، پوسٹ مارٹم گولی کا زاویہ اور فاصلہ بتائے گا اور بیلسٹکس بتائے گا کہ پستول کا میکانزم کیسا تھا۔ یہ وہ گواہ ہیں جو جھوٹ نہیں بولتے۔ ربیعہ کا حق انصاف ہے، اور انصاف شور سے نہیں، شواہد سے ملتا ہے۔

لیکن اس سارے قضیے میں ایک سچ ایسا ہے جس پر کوئی اختلاف نہیں: گولی اسی ہاتھ سے چلی جس نے پستول تھاما تھا۔ نیت جو بھی ہو، ایک عورت قبر میں ہے اور دو بچیاں ماں کے بغیر ہیں۔ اور یہاں آ کر مجھے وہ تعلیم یاد آتی ہے جو چودہ سو سال پہلے ہمیں دی گئی تھی، اور جسے ہم نے بیڈروم کی دراز میں رکھے پستول کے ساتھ بھلا دیا۔

رسول اللہ ﷺ نے فرمایا: تم میں سے کوئی اپنے بھائی کی طرف ہتھیار سے اشارہ نہ کرے، کیونکہ وہ نہیں جانتا کہ شاید شیطان اس کے ہاتھ کو ڈگمگا دے اور وہ جہنم کے گڑھے میں جا گرے۔ (بخاری، مسلم) غور کیجیے، یہ حدیث ارادے کی نہیں، حادثے کی بات کر رہی ہے۔ آپ ﷺ نے "شاید" کا لفظ استعمال فرمایا؛ یعنی خطرہ اس وقت بھی ہے جب نیت نہ ہو۔آپ ﷺ نے فرمایا: جو اپنے بھائی کی طرف لوہے سے اشارہ کرے، فرشتے اس پر لعنت کرتے ہیں جب تک وہ اسے چھوڑ نہ دے، خواہ وہ اس کا سگا بھائی ہی کیوں نہ ہو۔ (مسلم) یعنی مذاق میں بھی، اپنوں کے ساتھ بھی۔آپ ﷺ نے ننگی تلوار ہاتھ در ہاتھ دینے سے منع فرمایا (ابوداؤد، ترمذی)، اور حکم دیا کہ جو تیر لے کر مسجد یا بازار سے گزرے وہ ان کے پھل اپنی مٹھی میں تھام کر رکھے تاکہ کسی مسلمان کو خراش نہ آئے۔ (بخاری، مسلم) آج کی زبان میں اس کا مطلب ہے: ہتھیار ہمیشہ ان لوڈ، سیفٹی آن، نال زمین کی طرف، اور کبھی کسی انسان کی سمت نہیں۔آپ ﷺ نے فرمایا: کسی مسلمان کے لیے جائز نہیں کہ وہ کسی مسلمان کو ڈرائے۔ (ابوداؤد) ہتھیار سے کھیلنا، اسے لہرانا، کسی پر تاننا، سب اسی ممانعت میں آتا ہے۔اور قرآن نے قتلِ خطا کو بھی معمولی نہیں سمجھا۔ سورۃ النساء کی آیت 92 کے مطابق جو کسی مومن کو غلطی سے قتل کر دے اس پر دیت بھی ہے اور کفارہ بھی، دو ماہ کے مسلسل روزے، اللہ کی طرف سے توبہ کے طور پر۔ یعنی اسلام میں "غلطی سے ہو گیا" کہہ دینا بری ہو جانا نہیں۔ حادثہ بھی حساب مانگتا ہے۔

ربیعہ احسن کا مقدمہ عدالت طے کرے گی، لیکن ہمارا مقدمہ ہمیں خود طے کرنا ہے۔ ہمارے گھروں میں کتنے پستول ہیں جو "حفاظت" کے لیے رکھے گئے اور جن کی گولی ابھی چیمبر میں سو رہی ہے؟ ہم کتنی بار کسی کو ڈرانے کے لیے ہتھیار لہرا چکے ہیں؟ ہم کتنی بار کہہ چکے ہیں "خالی ہے، کچھ نہیں ہوتا"؟

گولی کی سب سے بڑی بدقسمتی یہ ہے کہ یہ واپس نہیں آتی۔ لفظ واپس لیے جا سکتے ہیں، معافی مانگی جا سکتی ہے، بیان بدلے جا سکتے ہیں، مقدمے واپس ہو سکتے ہیں، لیکن گولی واپس نہیں آتی۔ وہ ایک ہی سمت میں سفر کرتی ہے: زندگی سے موت کی طرف۔اللہ ربیعہ احسن کی مغفرت فرمائے، ان کی بچیوں کو صبر دے، اور ہمیں وہ عقل دے جو ٹریگر دبانے سے پہلے آنی چاہیے، بعد میں نہیں۔